ਅਫਸਰਸ਼ਾਹੀ ਖਿਲਾਫ ਵਿਧਾਇਕਾਂ ਦੇ ਰੋਹ ਨੇ ਵਧਾਇਆ ਸਿੱਧੂ ਦਾ ਕਾਫ਼ਿਲਾ -

ਅੰਮ੍ਰਿਤਸਰ, 21 ਜੁਲਾਈ 2021 : ਅੱਜ ਇਥੇ 60 ਤੋਂ ਵੱਧ ਵਿਧਾਇਕਾਂ ਅਤੇ ਹੋਰ ਸਿਰਕੱਢ ਆਗੂਆਂ ਦੀ ਕਾਂਗਰਸ ਦੇ ਨਵਨਿਯੁਕਤ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੇ ਘਰ ਮੌਜੂਦਗੀ ਨੇ ਸਾਬਿਤ ਕਰ ਦਿੱਤਾ ਕਿ ਪੰਜਾਬ ਦੇ ਮੁਖ ਮੰਤਰੀ ਕਪਤਾਨ ਅਮਰਿੰਦਰ ਸਿੰਘ ਦੀ ਸਰਕਾਰ ਦੇ ਦੌਰਾਨ ਅਫਸਰਸ਼ਾਹੀ ਦਾ ਹਾਵੀ ਹੋਣਾ ਹੀ ਮੁਖ ਮੰਤਰੀ ਵਿਰੁੱਧ ਕਾਂਗਰਸੀ ਵਿਧਾਇਕਾਂ ਦੇ ਰੋਹ ਦਾ ਕਾਰਣ ਬਣਿਆ ਹੈ I

ਸਿੱਧੂ ਦੇ ਘਰ ਮਜੂਦ ਵਧੇਰੇ ਵਿਧਾਇਕ ਅਤੇ ਮੰਤਰੀ ਅੱਜ ਇਸ ਗੱਲ ਤੇ ਪੱਕੇ ਨਜ਼ਰ ਆਏ ਕਿ ਸਿੱਧੂ ਨੂੰ ਨਾ ਹੀ ਕਿੱਸੇ ਗੱਲ ਦੀ ਮਾਫੀ ਮੰਗਣੀ ਚਾਹੀਦੀ ਹੈ ਅਤੇ ਨਾ ਕਿਸੇ ਅੱਗੇ ਝੁਕ ਕੇ ਪਾਰਟੀ ਚਲਾਉਣੀ ਚਾਹੀਦੀ ਹੈ I ਵਿਧਾਇਕਾਂ ਅਤੇ ਮੰਤਰੀਆਂ ਨੇ ਇਕ ਸੁਰ ਦੇ ਵਿਚ ਕਿਹਾ ਕਿ ਪਿਛਲੇ ਚਾਰ ਤੋਂ ਵੱਧ ਸਮੇ ਦੀ ਸਰਕਾਰ ਦੌਰਾਨ ਕਿਸੇ ਇਕ ਵਿਧਾਇਕ ਦੀ ਨਹੀਂ ਸੁਣੀ I ਵਿਧਾਇਕਾਂ ਦਾ ਰੋਸ਼ ਸਾਫ ਸੀ ਕਿ ਨਾ ਸਿਰਫ ਮੁਖ ਮੰਤਰੀ ਦਫਤਰ ਵਿਚ ਤਾਇਨਾਤ ਅਫਸਰ ਬਲਕਿ ਜ਼ਿਲਿਆਂ ਦੇ ਵਿਚ ਡੀ ਸੀ ਤੇ ਐਸ ਐਸ ਪੀ ਵੀ ਉਹਨਾਂ ਨੂੰ ਲਗਾਤਾਰ ਨਜ਼ਰਅੰਦਾਜ਼ ਕਰਦੇ ਹੈ I

ਵਿਧਾਇਕਾਂ ਅਨੁਸਾਰ ਇਸ ਦੇ ਉਲਟ ਸਾਰੇ ਦੇ ਸਾਰੇ ਅਫਸਰ ਅਕਾਲੀ ਆਗੂਆਂ ਦੇ ਕੰਮ ਬਿਨਾ ਕਿਸੇ ਰੋਕ ਟੋਕ ਦੇ ਕਰਦੇ ਰਹੇ ਜਿਸ ਨਾਲ ਲੋਕਾਂ ਦੇ ਵਿਚ ਕਾਂਗਰਸ ਪਾਰਟੀ ਦਾ ਮਾੜਾ ਅਕਸ ਗਿਆ I ਉਹਨਾਂ ਨੇ ਕਿਹਾ ਕਿ ਇਸ ਸਾਰੇ ਕੰਮ ਨਾਲ ਪੰਜਾਬ ਕਾਂਗਰਸ ਦੇ ਦੀ ਲੋਕਾਂ ਦੇ ਵਿਚ ਛਵੀ ਬੇਹੱਦ ਪ੍ਰਬਾਵਿਤ ਹੋਈ I ਇਥੋਂ ਤਕ ਕਿ ਮੰਤਰੀਆਂ ਦੇ ਵਿਭਾਗ ਦੇ ਅਫਸਰ ਉਹਨਾਂ ਦੀ ਨਹੀਂ ਸੁਣਦੇ ਸਨ ਜਿਸ ਨਾਲ ਲੋਕਾਂ ਦਾ ਸਰਕਾਰ ਤੋਂ ਵਿਸ਼ਵਾਸ ਉੱਠ ਗਿਆ I ਵਿਧਾਇਕਾਂ ਦਾ ਇਹ ਵੀ ਰੋਸ਼ ਹੈ ਕਿ ਜੇਕਰ ਕੋਈ ਮੰਤਰੀ ਜਾਂ ਵਿਧਾਇਕ ਅਫਸਰਾਂ ਦੇ ਖਿਲਾਫ ਵਬੋਲਦਾ ਸੀ ਤਾ ਸੰਬੰਧਿਤ ਅਫਸਰਾਂ ਖਿਲਾਫ ਕਾਰਵਾਈ ਦੇ ਬਜਾਏ ਜਾਂ ਤਾ ਮੰਤਰੀਆਂ ਦੇ ਵਿਭਾਗ ਬਦਲੇ ਗਏ ਜਾਂ ਫਿਰ ਓਹੀ ਦੋਸ਼ੀ ਅਫਸਰਾਂ ਨੂੰ ਪਨਾਹ ਦਿੱਤੀ ਗਈ ਜਿਸ ਕਾਰਣ ਉਹ ਵਿਧਾਇਕਾਂ ਦੀ ਹੁਕਮ ਅਦੂਲੀ ਕਰਨ ਲੱਗ ਪਏ I

ਸਿਰਫ ਇਹ ਹੀ ਨੀ ਪਹਿਲੀ ਵਾਰ ਕਿਸੇ ਸਰਕਾਰ ਵਿਚ ਅਜਿਹਾ ਹੋਇਆ ਹੈ ਜਿਥੇ ਦੋ ਦਰਜ਼ਨ ਤੋਂ ਵੱਧ ਸੇਵਾਮੁਕਤ ਅਧਿਕਾਰੀਆਂ ਨੂੰ ਪਾਰਟੀ ਕਾਰਕੁਨਾਂ ਦੇ ਹਿਤਾਂ ਨੂੰ ਓਹਲੇ ਕਰਕੇ ਸਰਕਾਰੀ ਅਹੁਦੇ ਦਿਤੇ ਗਏ ਹਨ I ਇਥੋਂ ਤਕ ਕਿ ਜ਼ਿਮਨੀ ਚੋਣਾਂ ਦੇ ਵਿਚ ਵੀ ਟਕਸਾਲੀ ਪਾਰਟੀ ਆਗੂਆਂ ਨੂੰ ਅੱਖੋਂ ਓਹਲੇ ਕਰਕੇ ਸੇਵਾਮੁਕਤ ਅਫਸਰਾਂ ਨੂੰ ਟਿਕਟਾਂ ਦਿਤੀਆਂ ਗਈਆਂ ਜਿਸ ਨਾਲ ਪਾਰਟੀ ਦਾ ਬਹੁਤ ਨੁਕਸਾਨ ਹੋਇਆ ਹੈ I ਇਸੇ ਦਾ ਕਾਰਣ ਹੈ ਕਿ ਜਦੋ ਉਹ ਕਮਾਂਡ ਦੇ ਥਾਪੇ ਨਾਲ ਸਿੱਧੂ ਪੰਜਾਬ ਆਏ ਹਨ ਤਾ ਅਫਸਰਸ਼ਾਹੀ ਵਲੋਂ ਹਾਸ਼ੀਏ ਤੇ ਧੱਕੇ ਗਏ ਇਹ ਸਾਰੇ ਵਿਧਾਇਕ ਹੁਣ ਮੁਖ ਮੰਤਰੀ ਦੀ ਬਜਾਇ ਨਵੇਂ ਪ੍ਰਧਾਨ ਨਾਲ ਖੜਣ ਨੂੰ ਤਵੱਜੋਂ ਦੇ ਰਹੇ ਹਨ I