ਚੀਮਾ ਨਮਿਤ ਪਾਠ ਦਾ ਭੋਗ ਤੇ ਅੰਤਿਮ ਅਰਦਾਸ 23 ਜੂਨ ਨੂੰ
ਪਟਿਆਲਾ 21 ਜੂਨ (2021)
ਮਿੱਠ ਬੋਲੜੇ, ਸਮਾਜ ਸੇਵਕ ਅਤੇ ਹਰ ਕਿਸੇ ਦੇ ਵੇਲੇ-ਕੁਵੇਲੇ ਕੰਮ ਆਉਣ ਵਾਲੇ ਸਾਬਕਾ ਸਰਪੰਚ ਪੁਸ਼ਪਿੰਦਰ ਸਿੰਘ ਚੀਮਾ ਪਿੰਡ ਛੰਨਾ ਨੱਥੂ ਵਾਲੀਆਂ ਜ਼ਿਲ੍ਹਾ ਪਟਿਆਲਾ ਬੀਤੀ 14 ਜੂਨ ਨੂੰ ਇਸ ਫਾਨੀ ਦੁਨੀਆਂ ਨੂੰ ਅਲਵਿਦਾ ਆਖ ਗਏ। ਉਹ ਆਪਣੇ ਪਿੱਛੇ ਮਾਤਾ ਸਰਦਾਰਨੀ ਸੁਰਿੰਦਰ ਕੌਰ, ਧਰਮਪਤਨੀ ਪਰਮਜੀਤ ਕੌਰ, ਭੈਣ ਨਵਦੀਪ ਕੌਰ, ਪੁੱਤਰੀ ਵਿਸ਼ਵਦੀਪ ਕੌਰ, ਭੈਣ ਨਵਦੀਪ ਕੌਰ, ਪੁੱਤਰ ਮਨਰਾਜਬੀਰ ਸਿੰਘ ਤੇ ਨੂੰਹ ਨੈਨਦੀਪ ਕੌਰ ਛੱਡ ਗਏ ਹਨ।
ਉਨ੍ਹਾਂ ਦੇ ਸਸਕਾਰ ਉਪਰੰਤ ਨਿਭਾਈਆਂ ਰਸਮਾਂ ਮੌਕੇ ਉਸਾਰੂ ਸੋਚ ਰੱਖਣ ਵਾਲੇ ਚੀਮਾ ਪਰਿਵਾਰ ਨੇ ਸਮਾਜ ਲਈ ਨਵੀਂ ਪਿਰਤ ਪਾਈ ਹੈ। ਪਰਿਵਾਰ ਨੇ ਮਰਹੂਮ ਮੁੱਖੀ ਦੇ ਫੁੱਲ ਚੁਗਣ ਉਪਰੰਤ ਸਮੁੱਚਾ ਅੰਗੀਠਾ ਸੰਭਾਲ ਕੇ ਆਪਣੇ ਖੇਤ ਵਿਚ ਇਕ ਵਿਸ਼ੇਸ਼ ਜਗ੍ਹਾ ਉੱਤੇ ਜਮੀਨ ਵਿੱਚ ਦੱਬ ਦਿੱਤਾ ਅਤੇ ਉਸ ਥਾਂ ਉਤੇ ਸਾਬਕਾ ਸਰਪੰਚ ਚੀਮਾ ਦੀ ਯਾਦ ਵਿਚ ਵਾਤਾਵਰਣ ਪ੍ਰੇਮੀ ਪਰਿਵਾਰਕ ਮੈਂਬਰਾਂ ਨੇ ਪੰਜ ਫਲਦਾਰ ਬੂਟੇ ਲਾਏ। ਇਸ ਮੌਕੇ ਸਵਰਗਵਾਸੀ ਸਰਪੰਚ ਚੀਮਾ ਦੇ ਜੀਜਾ ਸ. ਹਰੀ ਸਿੰਘ ਗਰੇਵਾਲ ਵਧੀਕ ਜ਼ਿਲਾ ਤੇ ਸੈਸ਼ਨ ਜੱਜ ਪਟਿਆਲਾ, ਭੈਣ ਨਵਦੀਪ ਕੌਰ, ਪੁੱਤਰੀ ਵਿਸ਼ਵਦੀਪ ਕੌਰ, ਪੁੱਤਰ ਮਨਰਾਜਬੀਰ ਸਿੰਘ, ਨੂੰਹ ਨੈਨਦੀਪ ਕੌਰ, ਜਵਾਈ ਗੁਰਸੇਵਕ ਸਿੰਘ ਬਰਾੜ ਐਡਵੋਕੇਟ ਪੰਜਾਬ ਤੇ ਹਰਿਆਣਾ ਹਾਈਕੋਰਟ, ਹਿੰਮਤਬੀਰ ਸਿੰਘ ਗਰੇਵਾਲ ਭਾਣਜਾ ਅਤੇ ਨਿਹਮਤ ਬਰਾੜ ਦੋਹਤੀ ਵੀ ਬੂਟੇ ਲਾਉਣ ਮੌਕੇ ਹਾਜ਼ਰ ਸਨ।
ਸਾਬਕਾ ਸਰਪੰਚ ਚੀਮਾ ਨਮਿੱਤ ਪਾਠ ਦਾ ਭੋਗ ਤੇ ਅੰਤਿਮ ਅਰਦਾਸ ਉਨ੍ਹਾਂ ਦੇ ਜੱਦੀ ਪਿੰਡ ਛੰਨਾ ਨੱਥੂ ਵਾਲੀਆ, ਨੇੜੇ ਭਾਦਸੋਂ, ਪਟਿਆਲਾ ਦੇ ਗੁਰਦਵਾਰਾ ਸਾਹਿਬ ਵਿਖੇ 23 ਜੂਨ ਨੂੰ ਦੁਪਹਿਰ 12 ਵਜੇ ਤੋਂ 1 ਵਜੇ ਤੱਕ ਹੋਵੇਗੀ। ਪਰਿਵਾਰ ਵੱਲੋਂ ਇਸ ਭੋਗ ਦੀ ਰਸਮ ਵੇਲੇ ਵੀ ਕੋਵਿਡ ਬਾਰੇ ਸਰਕਾਰ ਵੱਲੋਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਅਪੀਲ ਕੀਤੀ ਹੈ।
About The Author
