ਕੇਂਦਰ ਸਰਕਾਰ ਵੱਲੋਂ ਦੇਸ਼ ਭਰ ‘ਚ ਲਗਵਾਈ ਐਮਰਜੈਂਸੀ ਦੀਆਂ ਕੌੜੀਆਂ ਯਾਦਾਂ 50 ਸਾਲ ਬਾਅਦ ਵੀ ਲੋਕਾਂ ਦੇ ਮਨਾਂ ਅੰਦਰ ਕਾਇਮ : ਪ੍ਰੋ. ਬਡੂੰਗਰ

(Rajinder Kumar) ਪਟਿਆਲਾ, 10 ਜੁਲਾਈ 2025: ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਪ੍ਰੋਫੈਸਰ ਕਿਰਪਾਲ ਸਿੰਘ ਬਡੂੰਗਰ ਨੇ ਕਿਹਾ ਕਿ 1975 ਵਿੱਚ ਕੇਂਦਰ ਸਰਕਾਰ ਵੱਲੋਂ ਦੇਸ਼ ਭਰ ਵਿੱਚ ਲਗਵਾਈ ਗਈ ਐਮਰਜੈਂਸੀ ਦੀਆਂ ਕੌੜੀਆਂ ਯਾਦਾਂ ਅੱਜ 50 ਸਾਲ ਬਾਅਦ ਵੀ ਲੋਕਾਂ ਦੇ ਮਨਾਂ ਅੰਦਰ ਕਾਇਮ ਹਨ ।

ਉਨ੍ਹਾਂ ਕਿਹਾ ਕਿ 25-26 1975 ਦੀ ਅੱਧੀ ਰਾਤ ਨੂੰ ਭਾਰਤ ਦੀ ਤੱਤਕਾਲੀਨ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਨੇ ਆਪਣੀ ਇਲਾਹਾਬਾਦ ਹਾਈ ਕੋਰਟ ਤੋਂ ਚੋਣ ਪਟੀਸ਼ਨ ਹਾਰ ਜਾਣ ਤੋਂ ਬਾਅਦ ਭਾਰਤੀ ਸੰਵਿਧਾਨ ਨੂੰ ਮੁੱਅਤਲ ਕਰਕੇ ਦੇਸ ਵਾਸੀਆਂ ਵੱਲੋਂ ਜੰਗ-ਏ-ਅਜ਼ਾਦੀ ਵਿਚ ਅਣਗਿਣਤ ਕੁਰਬਾਨੀਆਂ, ਸ਼ਹੀਦੀਆਂ ਦੇ ਕੇ ਪ੍ਰਾਪਤ ਕੀਤੀ ਅਜ਼ਾਦੀ ਖਤਮ ਕਰ ਦਿਤੀ । ਉਨ੍ਹਾਂ ਕਿਹਾ ਕਿ ਕਾਂਗਰਸ ਵਿਰੋਧੀ ਪਾਰਟੀਆਂ ਦੇ ਵੱਡੇ ਲੀਡਰਾਂ ਅਤੇ ਕਾਂਗਰਸ ਅੰਦਰ ਹੀ ਕਾਰਜਸ਼ੀਲ ਦੀਆਂ ਗਲਤ ਨੀਤੀਆਂ ਦਾ ਵਿਰੋਧ ਕਰਨ ਵਾਲੇ ਨੇਤਾਵਾਂ ਨੂੰ ਜੇਲ੍ਹਾਂ ਵਿਚ ਸੁੱਟ ਦਿਤਾ, ਜਿਸ ਨਾਲ ਦੇਸ ਅੰਦਰ ਡਰ ਅਤੇ ਭੈਅ ਦਾ ਮਾਹੌਲ ਸਿਰਜ ਦਿਤਾ ਗਿਆ।

ਉਨ੍ਹਾਂ ਕਿਹਾ ਕਿ ਕਿਸੇ ਵੀ ਰਾਜਸੀ ਪਾਰਟੀ ਨੇ ਐਮਰਜੈਂਸੀ ਦਾ ਵਿਰੋਧ ਕਰਨ ਲਈ ਸੰਘਰਸ਼ ਨਾ ਕੀਤਾ, ਪਰੰਤੂ ਇਕੋ ਇਕ ਰਾਜਸੀ ਪਾਰਟੀ ਸ਼੍ਰੋਮਣੀ ਅਕਾਲੀ ਦਲ ਨੇ 9 ਜੁਲਾਈ 1975 ਤੋਂ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਮੋਰਚਾ ਅਰੰਭ ਕਰ ਦਿਤਾ ਤੇ ਮੋਰਚੇ ਵਿਚ 43000 ਅਕਾਲੀ ਯੋਧਿਆਂ, ਬਜੁਰਗਾਂ, ਨੌਜੁਆਨਾਂ, ਬੀਬੀਆਂ ਨੇ ਗ੍ਰਿਫਤਾਰੀਆਂ ਦਿਤੀਆਂ ਅਤੇ ਪੰਜਾਬ ਦੀਆਂ ਵੱਖ ਵੱਖ ਜੇਲ੍ਹਾਂ ਵਿਚ ਬੰਦ ਕਰ ਦਿਤਾ ਗਿਆ। ਜੇਲ੍ਹਾਂ ਅੰਦਰ ਭਾਰੀ ਮੁਸ਼ਕਲਾਂ ਅਤੇ ਸਖਤੀਆਂ ਦਾ ਸਾਹਮਣਾ ਸਾਰੇ ਅਕਾਲੀ ਯੋਧਿਆਂ ਨੇ ਪੂਰੀ ਦਲੇਰੀ ਅਤੇ ਦ੍ਰਿੜਤਾ ਨਾਲ ਮੁਕਾਬਲਾ ਕੀਤਾ ਤੇ ਕਿਸੇ ਨੇ ਵੀ ਮਾਫੀ ਤਾਂ ਕੀ ਮੰਗਣੀ ਸੀ ਕਿਸੇ ਨੇ ਜਮਾਨਤ ਤਕ ਨਾ ਕਰਵਾਈ, ਜਿਸ ਨਾਲ 20 ਸ਼ਹੀਦੀਆਂ ਹੋਈਆਂ, ਅੰਤ ਨੂੰ ਸਰਕਾਰ ਨੂੰ ਹਾਰਨਾ ਪਿਆ ਅਤੇ 17 ਜਨਵਰੀ 1977 ਨੂੰ ਐਮਰਜੈਂਸੀ ਖਤਮ ਕਰਕੇ ਲੋਕ ਸਭਾ ਦੀਆਂ ਚੌਣਾਂ ਦਾ ਐਲਾਨ ਕੀਤਾ। ਜਿਨ੍ਹਾਂ ਚੌਣਾਂ ਵਿਚ ਕਾਂਗਰਸ ਨੂੰ ਹਾਰ ਹੋਈ ਅਤੇ ਦੇਸ ਅੰਦਰ ਗੈਰ ਕਾਂਗਰਸ ਦੀ ਸਾਂਝੀ ਸਰਕਾਰ ਕਾਇਮ ਹੋਈ।

ਉਨ੍ਹਾਂ ਕਿਹਾ ਕਿ ਅੱਜ 50 ਸਾਲ ਬਾਅਦ ਵੀ ਐਮਰੈਂਸੀ ਦੀਆਂ ਕੌੜੀਆਂ ਯਾਦਾਂ ਲੋਕਾਂ ਦੇ ਮਨਾਂ ਅੰਦਰ ਕਾਇਮ ਹਨ ਅਤੇ ਹਰ ਭਾਰਤੀ ਮਨ ਵਿਚੋਂ ਕਾਂਗਰਸ ਦੀ ਨਿਖੇਧੀ ਕੀਤੀ ਜਾ ਰਹੀ ਹੈ। ਪ੍ਰੋ. ਬਡੂੰਗਰ ਨੇ ਕਿਹਾ ਉਹ ਖ਼ੁਦ ਵੀ ਇਸ ਮੋਰਚੇ ਵਿਚ ਪਟਿਆਲਾ ਜਿਲ੍ਹੇ ਤੋਂ 16 ਜੁਲਾਈ 1975 ਨੂੰ ਪਹਿਲਾ ਜਥਾ ਲੈ ਕੇ ਜੇਲ੍ਹ ਗਏ ਸਨ ਅਤੇ 18 ਜਨਵਰੀ 1977 ਨੂੰ ਪਟਿਆਲਾ ਜੇਲ੍ਹ ਤੋਂ ਬਾਹਰ ਆਏ ਸਨ।